Diplomun tanınması üçün təhsilin alındığı ali təhsil müəssisəsi müvafiq ölkənin səlahiyyətli qurumları tərəfindən akkreditasiya olunmuş olmalıdır.
a.Əgər təhsil ənənəvi (əyani) formada alınıbsa, tələbə təhsil ili ərzində ən azı 4 ay, ümumi təhsil müddətində isə minimum 21 ay təhsilin alındığı ölkədə fiziki olaraq iştirak etməlidir.
b.Qiyabi təhsil formasında tələbənin ən azı 3 həftə, ümumi tədris ilinin isə minimum üçdə bir hissəsində tədris prosesində iştirakı təmin olunmalıdır.
Tibb və səhiyyə sahələrində təhsil alanlar üçün əlavə tələblər tətbiq olunur. Bu ixtisaslarda təhsil müddətində minimum bir tədris ilində 8 ay fiziki iştirak tələb edilir.
Təqdim edilən diplomun həqiqiliyi təsdiqlənməli, saxta və ya şübhəli sənədlər tanınma üçün qəbul edilmir.
Diplom üzrə ixtisas Azərbaycan Respublikası Nazirlər Kabinetinin müvafiq qərarları ilə təsdiq edilmiş bakalavriat və magistratura ixtisas təsnifatlarında yer almalıdır. Təhsil müddətində keçilən fənlər seçilmiş ixtisasla məzmun və yük baxımından uyğunluq təşkil etməlidir.
Tam onlayn formada əldə edilmiş ali təhsil diplomları tanınmaya qəbul edilmir.
Xarici ali təhsil müəssisəsi tərəfindən verilmiş bakalavr və ya magistr diplomunun Azərbaycanda tanınması üçün əvvəlcə müvafiq kvalifikasiyanın tanınması məqsədilə rəsmi müraciət edilməlidir.
Müraciət yalnız elektron formada həyata keçirilir və bütün sənədlər müraciətçinin şəxsi kabinetinə yüklənməlidir. Elektron poçtla, məktubla və ya fiziki şəkildə təqdim edilən sənədlər qəbul edilmir.
Bakalavr diplomunun tanınması üçün aşağıdakı sənədlər təqdim edilməlidir:
diplom və apostilin əsli; diploma əlavə (transkript) və apostilin əsli; diplomun və apostilin notariat qaydada təsdiqlənmiş Azərbaycan dilinə tərcüməsi; transkriptin və apostilin notariat qaydada təsdiqlənmiş Azərbaycan dilinə tərcüməsi; şəxsiyyət vəsiqəsinin skan surəti (xarici vətəndaşlar üçün yaşama icazəsi); xarici pasportun skan surəti (şəkil və sərhədkeçmə möhürləri olan bütün səhifələr); hərbi biletin və ya hərbi qeydiyyat arayışının skan surəti.
Təhsil müddətində ali təhsil müəssisələri arasında köçürülmə baş veribsə, bunu təsdiq edən rəsmi arayışın da elektron surəti təqdim olunmalıdır. Əgər bakalavriata orta ixtisas təhsili əsasında qəbul olunmusunuzsa, həmin diplomun skan surəti də əlavə edilməlidir.
Magistr diplomunun tanınması zamanı isə:
magistr diplomu və apostilin əsli; diplom əlavəsi (transkript) və apostilin əsli; diplomun və transkriptin notariat təsdiqli Azərbaycan dilində tərcümələri; bakalavr diplomunun skan surəti; şəxsiyyət vəsiqəsi və pasportun skan surətləri; hərbi bilet və ya qeydiyyat arayışı tələb olunur.
Qeyd edilməlidir ki, diplom və transkript tanınma üçün müraciət edilməzdən əvvəl sənədin verildiyi ölkədə leqallaşdırılmalıdır. Bütün sənədlər PDF formatında, maksimum 5 MB həcmində, rəngli və oxunaqlı şəkildə yüklənməlidir.
Ali və orta ixtisas təhsilini bitirən şəxslər myGov.az portalı vasitəsilə təhsil haqqında arayış əldə edə, dövlət qurumları isə bu sənədlərin həqiqiliyini onlayn qaydada yoxlaya bilirlər.
Xarici diplomların tanınması prosesi zamanı Təhsil Nazirliyinə müraciətlərin hazırlanması və ya məhkəmə qaydasında iddia ərizələrinin tərtibi üçün hüquqi yardım almaq mümkündür.
